Հուլիսի 23-ին Երևանում՝ «Դիալոգ» կազմակերպության մշակութային կենտրոնում, առաջին անգամ ներկայացվեց Թբիլիսիի «Օբվոդնի պերեուլոկ» թատերական ստուդիայի «Հարևաններ» կատակերգական պիեսը, որի հեղինակն է Արտյոմ Գրիգորենցը։
Ներկա էին Մոսկվայում գործող «Դիալոգ» ՀԿ հիմնադիր ու նախագահ Յուրի Նավոյանը, որի աջակցությամբ էլ կայացավ պիեսի ներկայացումը, Հայաստանի թատերական գործիչների միության նախագահ Հակոբ Ղազանչյանը, մշակութային գործիչներ, թատերասերներ, հյուրեր։
Ներկաներին ողջունեց Ա․ Գրիգորենցը՝ կարևորելով այն, որ թբիլիսյան թատրոնը հանդես է գալիս Երևանում։
Բեմում հանդես եկան Դաիլդա Լետոդիանին, Իրինա Գրիգորյանը և Ալեքսեյ Բախոլդինը։
Ներկայացումը բեմադրել է հեղինակը՝ ժողովրդական թատրոնի ձևաչափով, իր մասնավոր թբիլիսյան «Օբվոդնի պերեուլոկ» թատերական ստուդիայում, որը գտնվում է Թբիլիսիի պատմական թաղամասում՝ հայ դասական գրող Նար-Դոսի բնակարանի հարևանությամբ։ Նար-Դոսի հետ ընկերություն է արել Ա. Գրիգորենցի պապը։
Հայտնի է, որ Թիֆլիսում (Թբիլիսի), որպես Ռուսական կայսրության Կովկասի վարչական կենտրոն, XIX դարի սկզբից բուռն զարգացում էր ապրում հայկական մշակույթը, որի անբաժանելի մասն են այստեղ ձևավորված հայկական թատերական ավանդույթները։
Արտյոմ Գրիգորենցը և նրա բազմազգ թիմը այդ հարուստ ժառանգության կրողներն են և իրենց գործունեությամբ ակտիվորեն զարգացնում են միջմշակութային երկխոսությունը։
Արդի թեմաներով երգիծական պիեսում հարևաններն են՝ տարբեր առիթներով վիճում են, սակայն միշտ էլ գտնում են նաև երկխոսելու, միմյանց նկատմամբ բարի լինելու ձևեր, առիթներ։ Օրինակ՝ վեճի առիթ է դառնում կոշկակարի շունը, որի բարձր հաչոցը խանգարում է հարևանուհուն։ Վերջինս առաջարկում է շան փոխարեն ակվարիումով ձուկ պահել, որը հանդարտեցնում է նյարդերը։ Հանդես է գալիս նաև կենցաղսպասարկման՝ տվյալ դեպքում գազի գրասենյակի ներկայացուցիչ-տեսուչը՝ իր «բարձրությամբ»։
Արտաքուստ թեթև լինելու հետևում թաքնված են փոխըմբռնման և մարդկային հաղորդակցության իմաստի վերաբերյալ խոր փիլիսոփայական մտորումներ։
Ներկայացումից հետո հյուրերի այցը Երևան կարևորեցին Յու․ Նավոյանը և Հ․ Ղազանչյանը։ Նման միջոցառումները նաև կարող են լինել երկխոսություն հայ և վրաց, նաև այլ ժողովուրդների միջև, բարեկամական կապ։
«Դիալոգ» կազմակերպության կարևոր առաքելություններից մեկն էլ ժողովուրդների բարեկամությունն է։
Նշենք՝ «Դիալոգ»-ի աջակցությամբ այսօր Երևանում վերակազմավորվել ու գործում են արցախյան մի քանի մշակութային խմբեր, որոնց ներկայացուցիչները նույնպես ներկա էին դահլիճում, տպագրվում են գրքեր։
Զոհրաբ Ըռքոյան
