Եվրամիությունը Ռուսաստանի դեմ նոր պատժամիջոցներ է սահմանել, որոնք վերաբերում են 48 ֆիզիկական և 170 իրավաբանական անձանց։
Նոր սահմանափակումներով պատժամիջոցների ցանկում ընդգրկվել են նաև Ռուսաստանում գործող երեք նավթավերամշակման գործարան, Բելառուսում գտնվող մեկ նավթավերամշակման գործարան, ինչպես նաև ընկերություն, որը զբաղվում է բելառուսական վառելիքի վաճառքով Ռուսաստանում։
Բացի այդ, ԵՄ-ն արգելել է գործարքներ իրականացնել Վրաստանի Քուլևիի նավթավերամշակման գործարանի հետ, որը վերամշակում է ռուսական նավթ։ Այս սահմանափակումը ուժի մեջ կմտնի վեց ամիս անց։
Նոր պատժամիջոցները նաև նախատեսում են լրացուցիչ վերահսկողություն Ռուսաստանին հեղուկացված բնական գազ (LNG) տեղափոխող տանկերների վաճառքի նկատմամբ։ Մասնավորապես, նման տանկերների վաճառքի մասին պարտադիր ծանուցում պետք է ներկայացվի, որպեսզի բացառվի դրանց հնարավոր վերավաճառքը Ռուսաստանին։
