Զախարովա․ ԱՄՆ-ն ձգտում է գործել՝ առանց հաշվի առնելու Միջուկային փորձարկումների համապարփակ արգելքի մասին պայմանագիրը
ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ ԱՄՆ-ն անտեսում է միջազգային պայմանագրերը, այդ թվում՝ Միջուկային փորձարկումների համապարփակ արգելքի մասին պայմանագիրը (ԴՎԶՅԱԻ)։ Նրա խոսքով՝ Վաշինգտոնը չի ցանկանում ստանձնել պայմանագրային պարտավորություններ և ձգտում է գործել՝ առանց այդ փաստաթղթի սահմանափակումները հաշվի առնելու։
Զախարովան ճեպազրույցի ընթացքում նշել է, որ ԴՎԶՅԱԻ-ն արդեն վավերացրել է 179 երկիր։ Սակայն, նրա գնահատմամբ, պայմանագրի ուժի մեջ մտնելուն երկար տարիներ խոչընդոտում է ԱՄՆ-ի դիրքորոշումը, քանի որ Վաշինգտոնը մինչ օրս չի վավերացրել այն, թեև ժամանակին եղել է դրա մշակման նախաձեռնողներից մեկը։ ՌԴ ԱԳՆ ներկայացուցիչը դա բնութագրել է որպես միջազգային իրավունքի, այդ թվում՝ սպառազինությունների վերահսկման, զինաթափման և չտարածման ոլորտի նկատմամբ արհամարհական վերաբերմունքի դրսևորում։
Նրա խոսքով՝ ԱՄՆ-ն հաճախ մասնակցում է միջազգային համաձայնագրերի մշակմանը, սակայն հետագայում խուսափում է ստանձնել դրանցով նախատեսված պարտավորությունները՝ միաժամանակ պահանջելով, որ մյուս երկրները լիովին պահպանեն այդ պայմանավորվածությունները։
Զախարովան նաև անդրադարձել է ԱՄՆ ղեկավարության և վարչակազմի որոշ ներկայացուցիչների նախկին հայտարարություններին, որոնցում թույլ էր տրվել միջուկային փորձարկումների վերսկսման հնարավորությունը։ Նրա գնահատմամբ՝ նման հայտարարությունները մարտահրավեր են բոլոր այն պետություններին, որոնք հավատարիմ են ԴՎԶՅԱԻ-ի նպատակներին, և վկայում են, որ Վաշինգտոնը պատրաստ է այս հարցում գործել՝ առանց պայմանագրի դրույթները հաշվի առնելու՝ իր քաղաքականությունը հիմնավորելով այլ երկրների հասցեին հնչեցվող, իր բնորոշմամբ, անհիմն մեղադրանքներով։ Այս մասին հայտնում է TASS-ը:
