Ընտրությունների և նախընտրական քարոզարշավի ընթացքում խախտումների վերաբերյալ ստացվել է 423 հաղորդում։ Այս մասին հայտնել է գլխավոր դատախազի տեղակալ Լիլիթ Գրիգորյանը 7 քաղաքական ուժերի հայցով ՍԴ նիստում։
Նրա խոսքով՝ նախաձեռնվել է 332 վարույթ, այդ թվում՝ 7-ը գլխավոր դատախազի հանձնարարությամբ։ 391 անձի նկատմամբ հարուցվել է քրեական հետապնդում տարբեր մեղադրանքներով, այդ թվում՝ կամարտահայտմանը խոչընդոտելու, փողերի լվացման, ընտրակաշառքի համար։ 15 պատգամավորի թեկնածուների նկատմամբ կալանքի միջնորդությունները բավարարվել են, ևս 3-ը դեռ չի քննվել։ Նա նաև հայտնել է, որ «Միասնության թևեր» կուսակցության հաղորդման հիման վրա՝ ընտրարշավին աշակերտների ներգրավման վերաբերյալ, հանգամանքների պարզաբանում է իրականացվում։
Պետական մարմինների աշխատակիցներին հանրահավաքներին մասնակցելու հարկադրանքի, վարչական ռեսուրսի օգտագործման, այդ թվում՝ կենսաթոշակների բարձրացման և այլնի մասով ստացվել է 36 հաղորդում, սակայն վարույթներ չեն նախաձեռնվել, քանի որ տեղեկությունները ստուգել չի հաջողվել։ Ընտրությունների ընթացքում ատելության խոսքի վերաբերյալ դատախազությունն ստացել է երկու հաղորդում, սակայն երկու դեպքում էլ վարույթներ չեն նախաձեռնվել, քանի որ հաղորդումները չեն համապատասխանել իրականությանը։
ՆԳՆ փոխնախարար Արմեն Ղազարյանը (ՆԳՆ-ն նույնպես ՍԴ-ում 7 քաղաքական կուսակցությունների հայցով հանդես է գալիս որպես համապատասխանող) հայտնել է, որ միգրացիոն ծառայության լիազորությունների շրջանակում ապահովվել է «մեկ անձ՝ մեկ ձայն» սկզբունքը։ Նրա խոսքով, մի շարք քաղաքացիների՝ բնակության վայրում քվեարկությանը մասնակցելու պահանջները բավարարվել են, իսկ 1 172-ը ներառվել է լրացուցիչ ցուցակներում։ Ինչ վերաբերում է անճշտություններին, ապա բոլոր հաղորդումների հիման վրա ստուգումներ են իրականացվել։
