Լոնդոնի Southwark համայնքային խորհուրդը առգրավել է երկսենյականոց բնակարանը Ուոլվորթ շրջանում, որը նախկինում վարձակալում էր Սիեռա Լեոնեի առաջին տիկին Ֆաթիմա Ջաբբե-Բիոն, հայտնում է The Guardian-ը։
Իշխանությունները հաստատել են, որ բնակարանը վերադարձվել է քաղաքի տնօրինությանը՝ բնակարանային խախտումների քննությամբ զբաղվող ստորաբաժանման կողմից իրականացված 12-ամսյա հետաքննությունից հետո։ Խորհրդի տվյալներով, բնակարանը կհանձնվի սոցիալական բնակարանի սպասման ցուցակում գտնվող ընտանիքի։
Մեծ Բրիտանիայում սոցիալական վարձակալության կանոնների համաձայն, համայնքային բնակարանը պետք է լինի վարձակալի հիմնական բնակության վայրը։ Ավելի վաղ ԶԼՄ-ները հայտնել էին, որ իշխանությունների մոտ հարցեր են առաջացել այս պահանջի պահպանման վերաբերյալ, քանի որ հարևանները պնդում էին, որ Ջաբբե-Բիոյին բնակարանում հազվադեպ էին տեսնում։ «Մենք կարող ենք հաստատել, որ Ուոլվորթում գտնվող այս օբյեկտը վերցրել ենք մեր վերահսկողության տակ՝ մեր բնակարանային հետաքննությունների թիմի 12-ամսյա քննությունից հետո»,- հայտարարել է Southwark-ի ներկայացուցիչը, որը պատասխանատու է համայնքային բնակարանի համար։
Նա հավելել է, որ վերադարձված բնակարանը կտրվի բնակարանի կարիք ունեցող ընտանիքի՝ ընդգծելով, որ իշխանությունները ձգտում են ապահովել համայնքային ֆոնդի նպատակային օգտագործումը։
Ինչպես նշվում է, Ջաբբե-Բիոն, Սիեռա Լեոնեի նախագահ Ջուլիուս Մաադա Բիոյի կինը, բնակարանի վարձակալների ցուցակում գրանցված էր 2007 թվականից և, ըստ հաղորդումների, ժամանակն անցկացնում է Մեծ Բրիտանիայի և Սիեռա Լեոնեի միջև։ Ավելի վաղ նա հերքել էր որևէ խախտում՝ BBC-ին տված հարցազրույցում հայտարարելով. «Իմ երեխաները Մեծ Բրիտանիայի քաղաքացիներ են։
Ես ինքս եմ վճարում այս բնակարանի վարձը։ Ես որևէ հանցագործություն չեմ կատարել»։ Միևնույն ժամանակ, իշխանությունները չեն հայտնում առաջադրված որևէ մեղադրանքի մասին։
Դեպքը լայն արձագանք է ստացել Լոնդոնում սոցիալական բնակարանի սուր պակասի ֆոնին, որտեղ տասնյակ հազարավոր ընտանիքներ հերթերում են բնակարան ստանալու համար, իսկ մեծ թվով մարդիկ ժամանակավորապես տեղավորված են վթարային կամ ժամանակավոր կացարաններում։
