Նիկոլ Փաշինյանի՝ Հանրային հեռուստաընկերության եթերում հնչեցրած հայտարարությունից հետո Արամ Սարգսյանի գլխավորած «Հանրապետություն» կուսակցությունը պատրաստվում է դիմել Կենտրոնական ընտրական հանձնաժողով՝ պահանջելով ուժը կորցրած ճանաչել «Ուժեղ Հայաստան» կուսակցությունների դաշինքի ընտրական ցուցակի գրանցումը։ Euromedia24-ի հետ զրույցում «Հանրապետություն» կուսակցության ներկայացուցիչ Անի Խաչատրյանը հաստատել է, որ նման դիմում ներկայացվելու է։ Նրա խոսքով՝ այս պահին զբաղվում են անհրաժեշտ փաստաթղթերի նախապատրաստմամբ։
Միևնույն ժամանակ, Կենտրոնական ընտրական հանձնաժողովից մեզ տեղեկացրին, որ այս պահի դրությամբ նման բովանդակությամբ որևէ դիմում դեռևս չեն ստացել։ Հիշեցնենք, որ երեկ Հանրային հեռուստաընկերության ուղիղ եթերում անցկացված քաղաքական ուժերի առաջնորդների բանավեճի ընթացքում վարչապետ Նիկոլ Փաշինյանը ընդդիմադիր ուժերին կոչ էր արել դիմել ԿԸՀ՝ «Ուժեղ Հայաստան» դաշինքի և այլ քաղաքական ուժերի գրանցումների հարցը քննարկելու համար։ «Ես որոշել եմ, որ մենք չենք դիմելու այդ հարցով։
Դուք կարող եք դիմել ԿԸՀ, որովհետև եթե մենք դիմենք, կասեն՝ վախեցան ընտրություններում պարտվելուց և փորձում են մրցակիցներին հեռացնել։ Դուք ինչո՞ւ չեք դիմում։ Դա Կենտրոնական ընտրական հանձնաժողովի լիազորությունն է, և ընտրական գործընթացի մասնակիցները նման իրավունք ունեն։ Ես կոչ եմ անում հենց վաղը դիմել, որպեսզի քննարկվի այդ հարցը։ Մենք չենք անելու դա, որովհետև հետո կասեն՝ իշխանությունը փորձում է մրցակիցներին դուրս թողնել ընտրապայքարից։ Նրանք լինելու են դաշտում, և մենք նրանց կհաղթենք ժողովրդի քվեով»,- հայտարարել էր Փաշինյանը։
