«Երկու կողմերն էլ կստորագրեն փոխըմբռնման հուշագիր, որը կգործի 60 օր և կարող է երկարաձգվել փոխադարձ համաձայնությամբ։ 60 օրվա ընթացքում Հորմուզի նեղուցը բաց կլինի առանց վճարովի նավերի, և Իրանը կհամաձայնվի մաքրել նեղուցում առկա ականները՝ նավերի անարգել անցումն ապահովելու համար», -«ԱՄՆ-ն և Իրանը կարող են ստորագրել 60-օրյա փոխըմբռնման հուշագիր» խորագրով հոդվածում հայտնում է Axios-ը՝ ԱՄՆ պաշտոնյային հղումով։
Համաձայնագիրը նաև նախատեսում է հրադադարի 60-օրյա երկարաձգում, սակայն Մերձավոր Արևելքում տեղակայված ամերիկյան ուժերը կմնան այնտեղ մինչև Իրանի հետ վերջնական համաձայնագրի կնքումը։
Վաշինգտոնը, ինչպես ակնկալվում էր, կվերացնի իրանական նավահանգիստների շրջափակումը և որոշ պատժամիջոցներ, ինչը թույլ կտա Թեհրանին ազատորեն վաճառել նավթը: Պորտալի աղբյուրի խոսքով՝ ամերիկացիները նաև պատրաստ են քննարկել Իրանի ակտիվների սառեցման հարցը վերջնական համաձայնագրի կնքումից հետո 60 օրվա ընթացքում։
Ավելին, փաստաթուղթը ներառում է Իրանի պարտավորությունը՝ չմշակել միջուկային զենք: Նախագիծը նաև ներառում է Իսրայելի և լիբանանյան «Հեզբոլլահ» շարժման միջև զինված հակամարտության դադարեցումը։
Մեկ օր առաջ ԱՄՆ նախագահ Դոնալդ Թրամփը հայտարարել էր, որ Իրանի հետ համաձայնագիրը գրեթե ավարտված է: Նա հավելել է, որ կողմերը շարունակում են քննարկել վերջնական մանրամասները և շուտով կհայտարարեն դրանց մասին։
