Ուկրաինայի նախագահ Վոլոդիմիր Զելենսկին հայտարարել է, որ ուկրաինական հետախուզությունը տվյալներ է ստացել Ռուսաստանի կողմից «Օրեշնիկ» հրթիռային համալիրի կիրառմամբ հարվածի նախապատրաստման մասին։ Նրա խոսքով՝ տեղեկատվությունն ստացվել է նաև ամերիկացի և եվրոպացի գործընկերներից։
«Ստացել ենք տվյալներ, այդ թվում՝ ամերիկացի և եվրոպացի գործընկերներից, որ ռուսները պատրաստվում են հարված հասցնել «Օրեշնիկ»-ի կիրառմամբ։ Ստուգում ենք այդ տեղեկատվությունը»,- ասել է Զելենսկին։
Նա նշել է նաև, որ Ուկրաինան արձանագրում է երկրի, մասնավորապես՝ Կիևի դեմ համակցված հարձակման նախապատրաստման նշաններ՝ տարբեր տեսակի զինատեսակների կիրառմամբ։ Զելենսկու խոսքով՝ այդ հարձակման ընթացքում կարող է կիրառվել նաև միջին հեռահարության նշված զինատեսակը։
Ուկրաինայի նախագահը քաղաքացիներին կոչ է արել արձագանքել օդային տագնապի ազդանշաններին և օգտվել ապաստարաններից։ Բացի այդ, նա հայտարարել է, որ Կիևը սպասում է արևմտյան գործընկերների կանխարգելիչ արձագանքին և շարունակելու է ուժեղացնել հակաօդային պաշտպանության համակարգը։
«Մենք հնարավորինս պատրաստում ենք ՀՕՊ-ը և արդարացի պատասխան ենք տալու յուրաքանչյուր ռուսական հարվածի»,- ընդգծել է Զելենսկին։
Ավելի վաղ ՌԴ նախագահ Վլադիմիր Պուտինը հանձնարարել էր ՌԴ պաշտպանության նախարարությանը ներկայացնել պատասխան քայլերի առաջարկներ՝ Ստրոբելսկի քոլեջի վրա ուկրաինական հարվածից հետո, որի հետևանքով կան զոհեր և վիրավորներ։
