Ընդդիմությունը մտադիր է կանխել Վրաստանում նոր գումարման խորհրդարանի առաջին նիստը, որը կազմավորվել է հոկտեմբերի 26-ին կայացած ընտրություններից հետո։ Այս մասին Թբիլիսիում խորհրդարանի շենքի մոտ տեղի ունեցող հանրահավաքում հայտարարել է ընդդիմադիր «Գիրչի» կուսակցության առաջնորդ, նախկին պատգամավոր Զուրաբ Ջափարիձեն։
«10 օրից, ըստ սահմանադրության, խորհրդարանի շենքում այդ աղբը պետք է հավաքվի և ճանաչի իր լեգիտիմությունը։Մենք չպետք է թույլ տանք, որ դա տեղի ունենա։ Մենք դա պետք է ինքներս անենք»,- ասել է Ջափարիձեն:Ջափարիձեի խոսքով՝ մեկ այլ կարևոր ամսաթիվ նոյեմբերի 21-ն է։ Սա ԿԸՀ-ի կողմից ԱԺ ընտրությունների ամփոփիչ արձանագրությունը հրապարակելու վերջնաժամկետն է։ Եվ այս օրը ընդդիմությունը պետք է հանրահավաք անցկացնի։
Թբիլիսիում խորհրդարանի շենքի մոտ ընդդիմության ցույց է ընթանում՝ ընդդեմ խորհրդարանական ընտրությունների արդյունքների։ Կազմակերպիչներն ու մասնակիցները պնդում են, որ ընտրությունները կեղծվել են, և իրենք չեն պատրաստվում դա ընդունել։ Իշխանությունների հակառակորդները ցուցարարներին բաժանել են կպչուն պիտակներ, որոնք պարունակում են հատուկ շտրիխ կոդ, որը սկանավորելուց հետո Telegram մեսենջերի օգտատերը կդառնա մի խմբի անդամ, որտեղ ամեն օր կտեղեկացվի ընդդիմության ծրագրերի մասին։
Վրաստանում խորհրդարանական ընտրությունները տեղի են ունեցել հոկտեմբերի 26-ին, առաջին անգամ էլեկտրոնային քվեատուփերի միջոցով։ Կենտրոնական ընտրական հանձնաժողովի տվյալներով՝ իշխող «Վրացական Երազանք» կուսակցությունըւ ստացել է ձայների 53,93 տոկոսը և ստացել է միայնակ կառավարություն ձևավորելու իրավունք։Խորհրդարան մտած բոլոր ընդդիմադիր կուսակցությունները հրաժարվել են ճանաչել ընտրությունների արդյունքները, քանի որ դրանք համարում են կեղծված։ Ընտրությունների արդյունքները չի ճանաչել նաև երկրի նախագահ Սալոմե Զուրաբիշվիլին։
