Գրենլանդիայի վարչապետ Յենս-Ֆրեդերիկ Նիլսենը ԱՄՆ-ի կողմից կղզու նկատմամբ «կրկնվող հռետորաբանությունը» համարում է անհարգալից և անընդունելի։ Նա կոչ է արել Վաշինգտոնին դադարեցնել ճնշումը, ակնարկները և «բռնակցման ֆանտազիաները»։
«Մենք սերունդներ շարունակ եղել ենք Միացյալ Նահանգների մտերիմ և հավատարիմ բարեկամը՝ ուս ուսի տված կանգնած դժվարին ժամանակներում», - գրել է նա Facebook-ում։
«Ահա թե ինչու է Միացյալ Նահանգների կրկնվող հռետորաբանությունը բացարձակապես անընդունելի։ Երբ ԱՄՆ նախագահը խոսում է Գրենլանդիան ցանկանալու մասին և մեզ կապում է Վենեսուելայի և ռազմական միջամտության հետ, դա ոչ միայն սխալ է, այլև անհարգալից է»։
Նիլսենը ընդգծել է, որ կղզին «մեծ տերությունների հռետորաբանության առարկա չէ», այլ ժողովուրդ և ժողովրդավարություն, որը պետք է հարգվի, հատկապես մտերիմ ընկերների կողմից։
«Սպառնալիքները, ճնշումները և բռնակցման մասին խոսակցությունները անընդունելի են ընկերների միջև։ Սա խոսելու ձև չէ այն ժողովրդի հետ, որը բազմիցս ցուցաբերել է պատասխանատվություն, կայունություն և հավատարմություն», - նաև գրել է կղզու վարչապետը։
