Վերջին միջազգային զարգացումները պահանջում են, որ Հյուսիսային Կորեան ամրապնդի իր միջուկային զսպման ուժը։ Այս մասին հայտարարել է Հյուսիսային Կորեայի առաջնորդ Կիմ Չեն Ընը՝ հունվարի 4-ին Կորեայի ժողովրդական բանակի կրակային հարվածային խմբի կողմից անցկացվող հիպերձայնային հրթիռների արձակման վարժանքներին հետևելիս, հաղորդում է KCNA լրատվական գործակալությունը։
Գերագույն գլխավոր հրամանատարը ընդգծել է, որ միջուկային զսպման ուժերի ամրապնդումը պահանջվում է «վերջին աշխարհաքաղաքական ճգնաժամի և բարդ միջազգային իրադարձությունների պատճառով»։ Զորավարժությունների նպատակն էր գնահատել հիպերձայնային զենքի համակարգի մարտական պատրաստվածությունը և Հյուսիսային Կորեայի զսպման ուժերի արդյունավետությունն ու շարժունակությունը։
Կիմ Չեն Ընը միջուկային զսպման ուժերի հիմնական բաղադրիչների փորձարկումն ու բնութագրերի կատարելագործումը, ինչպես նաև նման ուժերի կիրառման պրակտիկան անվանել է «կարևոր ռազմավարական խնդիր»։
Փհենյանի Ռյոկպո շրջանից հյուսիս-արևելյան ուղղությամբ արձակված հիպերձայնային հրթիռները հարվածել են 1000 կիլոմետր հեռավորության վրա գտնվող նշանակված թիրախներին Ճապոնական ծովում, որը Հյուսիսային Կորեան անվանում է Արևելյան ծով։
