Գյումրու ավագանու ՔՊ խմբակցության ղեկավար Սարիկ Մինասյանը ֆեյսբուքյան իր էջում, անդրադառնալով այսօր տեղի ունեցած վթարին, շնորհակալություն է հայտնել անհանգստության համար ու նշել, որ ծնողների կյանքին վտանգ չի սպառնում։
«Շնորհակալ եմ բոլորիդ ուշադրության և անհանգստության համար: Հասկանալի պատճառներով չեմ կարող պատասխանել ձեր հեռախոսազանգերին և նամակներին:
Այսօր վթարի են ենթարկվել ծնողներս: Փառք Աստծո, նրանց կյանքին վտանգ չի սպառնում»,-գրել է նա:
Ավելի վաղ հայտնել էինք, որ այսօր՝ հոկտեմբերի 31-ին, խոշոր ավտովթար է տեղի ունեցել Արագածոտնի մարզում: Ժամը 15:10-ի սահմաններում Երևան-Գյումրի ավտոճանապարհի Փարպի բնակավայրի վարչական տարածքում դեպի Երևան ընթանալիս «Ford» մակնիշի ավտոմեքենան բախվել է քարով բարձված «ԶԻԼ 130» մակնիշի ավտոմեքենային:
Ինչպես հայտնում է Shamshyan.com-ը, վթարի հետևանքով «Ford»-ի վարորդն ու ուղևորը տեղափոխվել են Երևանի տարբեր հիվանդանոցներ:
Շամշյանի տեղեկություններով՝ «Ford»-ի վարորդն ու ուղևորը, որոնց առողջական վիճակը գնահատվում է միջին ծանրության, Գյումրու ավագանու ՔՊ խմբակցության ղեկավար Սարիկ Մինասյանի ծնողներն են:
