Վրաստանի նախագահ Միխեիլ Կավելաշվիլին հայտարարել է, որ ՄԱԿ-ի Գլխավոր ասամբլեայի 80-րդ նստաշրջանի շրջանակներում իր ամերիկացի գործընկեր Դոնալդ Թրամփի հետ հանդիպման ժամանակ առաջարկել է երկրների միջև հարաբերությունները սկսել զրոյից։
«Ես ԱՄՆ նախագահին ասացի, որ ժամանակն է մեր հարաբերությունները սկսել զրոյից, ինչին նա պատասխանեց, որ կհետևի այս հարցին և խոստացավ, որ անպայման կվերադառնա այս թեմային և կկապվի ինձ հետ. մենք կսպասենք պատասխանի», - լրագրողներին ասել է Կավելաշվիլին՝ ամփոփելով Նյու Յորք կատարած այցը։
Վրաստանի պետության ղեկավարը հավելել է, որ Նյու Յորքում հանդիպել է նաև ԱՄՆ առևտրի նախարար Հովարդ Լուտնիկի հետ։
Ավելի վաղ Կավելաշվիլին և Վրաստանի վարչապետ Իրակլի Կոբախիձեն բաց նամակներ էին հղել Թրամփին՝ առաջարկելով հարաբերությունների վերագործարկում։
Վրաստանի հարաբերությունները Միացյալ Նահանգների հետ զգալիորեն վատթարացան 2024 թվականին, այն բանից հետո, երբ երկիրն ընդունեց օտարերկրյա գործակալների մասին օրենք։
