Երեկ գիշերը Թբիլիսիի Լոտկինի թաղամասում երկու պայթյուն է տեղի ունեցել: Նախնական տեղեկություններով՝ երկու դեպքում էլ պատճառը գազի արտահոսքն է եղել:
Արտակարգ իրավիճակների կառավարման ծառայությունը տեղեկացրել է «Ռադիո Ազատությանը», որ պայթյունի ժամանակ վիրավորվել է մեկ անձ։ Երիտասարդ աղջկան շտապ օգնությունը տեղափոխել է կլինիկա։
Աղջկա վիճակը այժմ կայուն ծանր է: Խեչինաշվիլիի անվան համալսարանական կլինիկայի այրվածքների կենտրոնի ղեկավար Գուգա Կաշիբաձեն ասել է «Ռադիո Ազատությանը», որ հիվանդի մարմնի 48%-ն այրվել է:
«Այս պահին հիվանդի վիճակը կայուն է, սակայն լուրջ այրվածքներ ունի: Մարմնի 48%-ը այրվել է՝ դեմքը, գլուխը, կրծքային հատվածը, վերին վերջույթները և մեջքը: Սրան նաև ավելանում է այրվածքային շոկը, սակայն նրա վիճակը կայուն է», — ասել է այրվածքների կենտրոնի ղեկավարը:
Պայթյունի մասին սոցիալական ցանցում գրել է քաղաքացի Լաշա Շերոզիան։ Նրա խոսքով, առաջին պայթյունից հետո շրջակայքում դեռ գազի հոտ է զգացվել, և մարդիկ պահանջել են ստուգել գազաղբյուրները։
«Մենք հրաշքով փրկվեցինք… Երեկ մեր դիմացի շենքը պայթեց։ 19 տարեկան աղջիկը բարեբախտաբար փրկվեց։ Դրանից հետո դարձյալ գազի հոտ էր գալիս։ Ես փրկարարներին ասացի, որ գազի հոտ կա, և ամեն ինչ պետք է ստուգել։ Նրանք իմ ասածը անտարբերության մատնեցին և ասացին, որ վտանգն անցել է, իսկ հոտը քիչ անց կանցնի։ Բայց դրանից հետո տեղի ունեցավ շատ ուժեղ պայթյուն, և շենքը փլուզվեց», — գրել է Լաշա Շերոզիան։
Ներքին գործերի նախարարությունը քրեական գործ է հարուցել Քրեական օրենսգրքի 240-րդ և 240-րդ պրիմա հոդվածներով։ ՆԳՆ-ն քննում է օբյեկտում անվտանգության կանոնների խախտման վարկածը։
