Նյու Յորքում ընթացող «Concordia» 15-րդ տարեկան գագաթնաժողովի շրջանակում հանդիպեցի Կոլումբիայի նախկին նախագահ Իվան Դուկեին: Այս մասին Ֆեյսբուքի իր էջում հայտնել է Շրջակա միջավայրի նախարար Համբարձում Մաթևոսյանը։
Հանդիպման ընթացքում քննարկեցինք 2024 թվականին Կոլումբիայում կայացած ՄԱԿ-ի Կենսաբազմազանության մասին կոնվենցիայի կողմերի 16-րդ համաժողովի (COP16) փորձը և դրա կիրառելիությունը 2026 թվականին Երևանում կայանալիք COP17-ի կազմակերպման ու նախապատրաստման գործընթացներում։
Հատուկ ուշադրություն դարձրեցինք համաժողովի ներառականության բարձրացմանը՝ քաղաքացիական հասարակության և հասարակական կազմակերպությունների արդյունավետ ներգրավմամբ, տեղական համայնքների ու բնիկ ժողովուրդների մասնակցության ապահովմամբ, ինչպես նաև թափանցիկության և հաշվետվողականության մեխանիզմների ամրապնդմամբ։
Քննարկեցինք նաև կազմակերպչական և ծրագրային հաջորդ քայլերը՝ փորձի փոխանակման, փորձագիտական աջակցության և գործընկեր կառույցների հետ համակարգված համագործակցության միջոցով։
Համաձայնեցինք շարունակել սերտ գործակցությունը՝ նպատակ ունենալով Երևանում իրականացնել բարձր միջազգային չափանիշներին համապատասխան, ազդեցիկ օրակարգ ունեցող համաժողով, որը կխթանի կենսաբազմազանության պահպանության համաշխարհային ջանքերը։
