Եվրոպացի առաջնորդները չէին սպասում, որ ԱՄՆ նախագահ Դոնալդ Թրամփը օգոստոսի 18-ին Սպիտակ տանը իրենց հետ հանդիպումից անմիջապես հետո կզանգահարի Ռուսաստանի նախագահ Վլադիմիր Պուտինին, Fox News-ի եթերում հայտարարել է ԱՄՆ փոխնախագահ Ջեյ Դի Վենսը։
«Նախագահն ասաց. «Դա լավ հանդիպում էր, ես պատրաստվում եմ զանգահարել Վլադիմիր Պուտինին՝ տեսնելու, թե նա ինչ ունի ասելու այդ մասին»։ Եվ բոլորը հարցրին. «Կզանգե՞ք հաջորդ շաբաթ», -ասել է Վենսը՝ նկարագրելով խորհրդակցությունները։ԱՄՆ փոխնախագահի խոսքով՝ Թրամփը պատասխանել է. «Ոչ։
Ժամը քանի՞սն է Մոսկվայում։ Ես հենց հիմա կզանգահարեմ նրան»։ Ինչպես ընդգծել է Վենսը, հանդիպման մյուս մասնակիցները «չէին սպասում» նման քայլ ամերիկացի առաջնորդից։«Շատ եվրոպացիներ ասացին. «Ո՛չ, ո՛չ, ո՛չ։ Պետք է պատշաճ նախապատրաստություն լինի, օգնականները պետք է պատրաստ լինեն զրույցին և այլն», – նշել է ԱՄՆ փոխնախագահը։
Նրա խոսքով՝ Թրամփը չի լսել այս փաստարկները և անմիջապես զանգահարել է Ռուսաստանի առաջնորդին։Ինչպես ավելի վաղ հայտնել էր ամերիկյան Axios պորտալը՝ հղում անելով աղբյուրներին, Թրամփը հեռախոսազրույց է ունեցել Պուտինի հետ այն ժամանակ, երբ Սպիտակ տանը գտնվում էին եվրոպական երկրների ներկայացուցիչները և Վլադիմիր Զելենսկին։
