Կոլումբիայում ծնողները նորածին դստերը անվանել են հռչակավոր չատ-բոտի՝ ChatGPT-ի անունով, հայտնում է UPI-ն։
Կորդովա դեպարտամենտի Սերետե փոքրիկ քաղաքում կոլումբիական մի ընտանիք լայն քննարկումների ալիք է բարձրացրել՝ նորածին դստերը անվանելով Չատ Յիպիտի Բաստիդաս Գեռա՝ ի պատիվ հայտնի ChatGPT ծրագրի։
Տեղական ԶԼՄ-ների հաղորդմամբ՝ ծնողները նշել են, որ անունի ընտրությունը իրենց համար եղել է «հարգանքի տուրք նոր տեխնոլոգիաների ու արհեստական բանականության դարաշրջանին»։ Ազգային քաղաքացիական գրանցման բաժինը առանց առարկության գրանցել է այդ անսովոր անունը։
Շատ օգտատերեր տարակուսանք ու կասկածներ են հայտնել՝ կարծելով, որ այդ անունով երեխային ապագայում հեշտ չի լինելու։ Մյուսները, հակառակը, ծնողների որոշումը համարել են օրիգինալ և նույնիսկ «առաջադեմ»։
Թեև Կոլումբիայի օրենքները կոնկրետ անունների վրա արգելք չեն դնում, Ազգային ռեգիստրի պաշտոնյաները իրավասու են մերժել որևէ անուն, եթե այն կարող է նվաստացուցիչ լինել երեխայի համար կամ վնասել նրա հեղինակությանը։
Թարգմանությունը՝ Euromedia24.com-ի
