Պակիստանում մի տղամարդ փրկել է իր կնոջը, որին կոկորդիլոսը քարշ էր տվել ջուրը։ Այս մասին հայտնել է Pakistan Observer թերթը։
Կինը հագուստ էր լվանում Սինդ նահանգի Սուկկուր քաղաքի մոտ գտնվող Նարա ջրանցքի ափին։ Ջրում թաքնված մեծ կոկորդիլոսը հարձակվել է նրա վրա, բռնել նրա ոտքը և սկսել է քարշ տալ դեպի խորքը։
Մոտակայքում գտնվող ամուսինը չի վախեցել հսկայական սողունից և կարողացել է կոկորդիլոսի բերանից դուրս հանել կնոջը՝ փրկելով նրան։
Կինը լուրջ վնասվածքներ է ստացել։ Նրան անգիտակից վիճակում տեղափոխել են հիվանդանոց։ Բժիշկները նրա վիճակը գնահատել են ծանր։
Տեղի բնակիչները կոչ են արել իշխանություններին անհապաղ ձեռնարկել բոլոր միջոցները անվտանգությունն ապահովելու համար, քանի որ կոկորդիլոսը շարունակում է գտնվել ջրանցքի ափին։
Նշենք նաև, որ օգոստոսի 6-ին հաղորդվել էր, որ Ֆլորիդա նահանգում շերիֆի օգնականը մերկ ձեռքերով հանել էր ալիգատորին մասնավոր լողավազանից։
Թարգմանությունը՝ Euromedia24.com-ի
