Բելառուսի և Ռուսաստանի «Զապադ-2025» ռազմավարական զորավարժությունները կանցկացվեն սեպտեմբերի 12-16-ը։ Այս մասին հայտնել է միջազգային ռազմական համագործակցության վարչության պետ - Բելառուսի պաշտպանության նախարարի միջազգային ռազմական համագործակցության հարցերով օգնական Վալերի Ռևենկոն։
«Բելառուսի Հանրապետության և Ռուսաստանի Դաշնության զինված ուժերի «Զապադ-2025» համատեղ ռազմավարական զորավարժությունները տեղի կունենան 2025 թվականի սեպտեմբերի 12-ից 16-ը», - ասել է նա ճեպազրույցի ժամանակ։
Նրա խոսքով՝ զորավարժությունների թեման կլինի զորքերի խմբավորումների կիրառումը՝ Միութենական պետության ռազմական անվտանգության ապահովման շահերից ելնելով։
«Ընդհանուր նպատակն է ստուգել Բելառուսի Հանրապետության և Ռուսաստանի Դաշնության կարողությունները՝ Միութենական պետության ռազմական անվտանգությունն ապահովելու, հնարավոր ագրեսիան հետ մղելու պատրաստակամության համար», - նշել է Ռևենկոն։
Նա ընդգծել է, որ Մինսկը խաղաղասեր քաղաքականություն է վարում և իրականացնում է մի շարք միջոցառումներ, որոնք ուղղված են պետության ռազմական անվտանգության ապահովմանը։
