Թուրքիայի Հանրապետությունը կրկին ցնցվում է. ևս մեկ երկրաշարժ է տեղի ունեցել մի շարք նահանգներում, այդ թվում՝ ամենամեծ քաղաքում՝ Ստամբուլում։
Եվրոպական-միջերկրածովյան սեյսմոլոգիական կենտրոնի տվյալներով՝ Ստամբուլում ցնցումները հասել են 5.9 մագնիտուդի։ Ցնցումներն ամենաուժեղն են եղել քաղաքի արևմուտքում, որտեղ ցնցումների տևողությունը կազմել է մոտ 20-30 վայրկյան։
Սակայն ամենաուժեղ երկրաշարժը տեղի է ունեցել թուրքական Սինդիրգի քաղաքում: Ինչպես «Հաբերթյուրք» հեռուստաալիքին հայտնել է այս քաղաքի քաղաքապետ Սերքան Սաքը, այստեղ ցնցումների ուժգնությունը կազմել է 6.1 մագնիտուդ։
Քաղաքապետը մանրամասնել է, որ Սինդիրգիում փլուզվել է առնվազն տասը շենք, և վնասվել են ևս մի քանի տներ։ Դրանից հետո թուրքական լրատվամիջոցները հաղորդել են մի շարք հարևան նահանգներում երկրաշարժի մասին։
Թուրքիայի Ներքին գործերի նախարարության տվյալներով՝ Բալըքեսիր քաղաքում փլուզվել է 16 շենք, սակայն դրանցից միայն չորսն են մշտապես բնակեցված եղել։ Փլատակների տակից կենդանի դուրս են բերվել չորս մարդ, սակայն նրանցից մեկը՝ 81-ամյա մի տղամարդ, ավելի ուշ մահացել է։
