Պեկինում սկսել է գործել Robot Mall-ը՝ Չինաստանում առաջին մասնագիտացված խանութը, որը առաջարկում է լայն տեսականի մարդանման և սպառողական ռոբոտների։ Խանութը ներառում է ցուցասրահ (շոուռում), սպասարկման կենտրոն և պահեստամասերի պահեստ, ինչով նմանվում է ավտոմեքենաների դիլերային կենտրոնի, հաղորդում է BBC-ն։
Խանութում ներկայացված է ավելի քան 100 մոդել՝ սկսած ինտերակտիվ ռոբոտաշներից մինչև մարդանման ռոբոտներ, այդ թվում՝ Ալբերտ Էյնշտեյնի արտաքնով։ Գները տատանվում են 2000-ից մինչև մի քանի միլիոն յուան (մոտավորապես 22 հազարից մինչև մի քանի տասնյակ միլիոն ռուբլի)։
Robot Mall-ի բացումը համընկել է Պեկինում անցկացվող Ռոբոտատեխնիկայի համաշխարհային համաժողովի հետ։ Միջոցառմանը մասնակցել է ավելի քան 200 ընկերություն, որոնք ներկայացրել են 1500 ցուցանմուշ ամբողջ աշխարհից։ Բացի ցուցահանդեսից, չինական մայրաքաղաքը պատրաստվում է հյուրընկալել մարդանման ռոբոտների առաջին Համաշխարհային խաղերը, որոնք կանցկացվեն օգոստոսի 14-ից 17-ը։ Խաղերը կներառեն տարբեր մրցաձևեր՝ ֆուտբոլ, պար, աթլետիկա և այլն։
Նշվում է նաև, որ խանութը տեղակայված է թեմատիկ ռեստորանի կողքին, որտեղ հաճախորդներին սպասարկում են ռոբոտ-մատուցողները, իսկ ուտեստները պատրաստում են ավտոմատացված խոհարարները։
Թարգմանությունը՝ Euromedia24.com-ի
