Իսրայելը քննարկում է Մեծ Բրիտանիայի հետ հետախուզական տվյալների փոխանակումը դադարեցնելու հարցը, եթե ճանաչի Պաղեստին պետությունը, հաղորդում է The Times-ը՝ հղում անելով դիվանագիտական աղբյուրներին։Հրատարակության տվյալներով՝ Իսրայելի հետ պաշտպանության և հետախուզության ոլորտում համագործակցության դադարեցումը կարող է խաթարել Մեծ Բրիտանիայի ազգային անվտանգությունը։
Ներկայումս հրեական պետությունը բրիտանական հետախուզական ծառայություններին տրամադրում է տեղեկատվություն Միացյալ Թագավորությունում ահաբեկչական սպառնալիքների, ինչպես նաև Իրանի հետախուզական գործունեության վերաբերյալ։
Միաժամանակ, թերթը շեշտել է, որ Իսրայելի կառավարությունը դեռևս միասնական դիրքորոշում չունի այս հարցի վերաբերյալ։
Մասնավորապես, հրեական պետության իշխանությունները մտավախություն ունեն, որ բրիտանական կողմի հետ հետախուզական տվյալների փոխանակման դադարեցումը բացասաբար կանդրադառնա տնտեսության վրա, քանի որ այս դեպքում Լոնդոնը կարող է հրաժարվել իսրայելական պաշտպանական ընկերությունների հետ պայմանագրերից, որոնք խորապես ինտեգրված են թագավորության ռազմարդյունաբերական համալիրում։
