Իսրայելի կառավարության կողմից հաստատված՝ Արևմտյան ափին 22 նոր հրեական բնակավայրեր կառուցելու ծրագրերը մարտահրավեր են միջազգային իրավունքին և հանգեցնում են լարվածության վտանգավոր սրման։ Այս մասին հայտարարել է Պաղեստինի նախագահի պաշտոնական ներկայացուցիչ Նաբիլ Աբու Ռուդեյնան, հաղորդում է WAFA լրատվական գործակալությունը։Նրա խոսքով՝ «Իսրայելի կաբինետի լուռ որոշումը՝ հաստատել Արևմտյան ափին, այդ թվում՝ Արևելյան Երուսաղեմում, 22 նոր բնակավայրերի շինարարությունը, հանգեցնում է վտանգավոր սրման և մարտահրավեր է միջազգային իրավունքին ու միջազգային արդարադատությանը»։
Աբու Ռուդեյնան հիշեցրել է, որ «իսրայելական իշխանությունների որոշումը խախտում է բոլոր միջազգային բանաձևերն ու օրենքները, մասնավորապես՝ ՄԱԿ-ի Անվտանգության խորհրդի 2334 բանաձևը, որի համաձայն՝ պաղեստինյան տարածքներում, այդ թվում՝ Արևելյան Երուսաղեմում, բնակավայրերի կառուցման ողջ գործունեությունը միջազգային իրավունքի համաձայն համարվում է անօրինական»։
