Միացյալ Նահանգները լավ բանակցություններ է վարել Իրանի հետ և առաջընթաց է գրանցել Թեհրանի միջուկային ծրագրի հարցում։ Այս մասին կիրակի օրը հայտարարել է ԱՄՆ նախագահ Դոնալդ Թրամփը՝ Նյու Ջերսիից Վաշինգտոն թռիչքից առաջ։ Նրա զրույցը լրագրողների հետ հեռարձակվել է ամերիկյան լրատվական հեռուստաալիքներով։
«Շատ կարևոր է, որ երեկ և այսօր մենք շատ լավ բանակցություններ ունեցանք Իրանի հետ, և տեսնենք, թե ինչ կստացվի դրանից։ Բայց կարծում եմ, որ մենք կարող ենք լավ նորություններ ունենալ իրանական ճակատում։ Եվ չգիտեմ՝ հաջորդ երկու օրերին ձեզ լավ բան կասեմ, թե վատ, բայց զգում եմ, որ կարող եմ ձեզ լավ բան ասել։ Մենք իրական առաջընթաց ենք գրանցել, լուրջ առաջընթաց»,-ասել է ամերիկացի առաջնորդը։
Նրան հարցրել են, թե արդյոք մոտ ապագայում Թեհրանի միջուկային ծրագրի վերաբերյալ ԱՄՆ-Իրան բանակցությունների ևս մեկ փուլ կլինի։«Շատ շուտով Իրանի հետ բանակցություններ կլինեն։ Ես չեմ կարող ասել, թե վաղը ինչ կլինի։ Կարող եմ ասել, որ Իրանի հետ բանակցությունները շատ լավ են ընթանում։ Ես շատ կցանկանայի տեսնել, որ միջուկային համաձայնագիրը կնքվի», -եզրափակել է Թրամփը։
