ՆԱՏՕ-ի ղեկավարությունը մտադիր է Ճապոնիայի, Հարավային Կորեայի, Ավստրալիայի և Նոր Զելանդիայի առաջնորդներին հրավիրել դաշինքի հունիսյան գագաթնաժողովին՝ շարունակելով Ասիա-խաղաղօվկիանոսյան տարածաշրջանի երկրների հետ կապերն ամրապնդելու իր ընթացքը:
Այս մասին հայտնում է NHK հեռուստաալիքը։Հունիսի 24-ին և 25-ին Հաագայում կայանալիք գագաթնաժողովի ընթացքում Ասիայում ՆԱՏՕ-ի գործընկերների հետ առանձին հանդիպումներ չեն սպասվում, սակայն ՆԱՏՕ-ի գլխավոր քարտուղար Մարկ Ռյուտեն կարող է հանդիպել այս երկրների ղեկավարների հետ։ՆԱՏՕ-ն երեք տարի առաջ սկսել է Ասիա-խաղաղօվկիանոսյան տարածաշրջանի գործընկեր երկրների ղեկավարներին հրավիրել գագաթնաժողովների՝ ԱՄՆ նախկին նախագահ Ջո Բայդենի վարչակազմի նախաձեռնությամբ, որպեսզի, ինչպես նշում է հեռուստաալիքը, զսպող ազդեցություն գործադրեն Ռուսաստանի վրա։
Դաշինքը, ինչպես շեշտում է NHK-ն, նախատեսում է հետագայում զարգացնել կապերը Ասիա-Խաղաղօվկիանոսյան տարածաշրջանի հետ՝ Ռուսաստանի և Չինաստանի միջև հարաբերությունների ամրապնդման ֆոնին տնտեսության և անվտանգության ոլորտներում, ինչը Արևմուտքը տեսնում է որպես սպառնալիք։
Հաագայում ՆԱՏՕ-ի գագաթնաժողովը կարող է առիթ հանդիսանալ Ճապոնիայի վարչապետ Շիգերու Իսիբայի համար՝ հանդիպելու Հարավային Կորեայի նոր նախագահի հետ, ով կընտրվի հունիսի 3-ին։
