Հնդկաստանի իշխանությունները որոշում են կայացրել վերսկսել Պակիստանի հետ սահմանի մոտ գտնվող օդանավակայանների աշխատանքը, որոնք ավելի վաղ փակվել էին երկու երկրի միջև լարվածության սրման պատճառով: Հնդկաստանի իշխանությունները հայտարարել էին տասնյակ օդանավակայանների փակման մասին մինչև մայիսի 15-ը, հայտնում է Hindustan Times թերթը։
Պարբերականի տվյալներով՝ հրամանը վերաբերում է 32 օդային հանգրվանի։ Թերթի աղբյուրը, իր հերթին, հայտնել է, որ մի քանի օդանավակայան արդեն սկսել է չվերթերի ընդունումն ու ուղարկումը: Ավելի վաղ Իսլամաբադն էր հայտնել, որ երկրի օդային տարածքը լրիվ բաց է բոլոր տեսակի թռիչքների համար։
Մայիսի 10-ին ԱՄՆ նախագահ Դոնալդ Թրամփը հայտարարել էր, որ Հնդկաստանը և Պակիստանը համաձայնության են եկել հրադադարի շուրջ։ Պակիստանի արտաքին գործերի նախարար Իսհակ Դարն էլ ավելի ուշ հաստատել է տեղեկատվությունը։
Հնդկաստանի և Պակիստանի հարաբերությունները սրվել են, երբ ապրիլի 22-ին Ջամու և Քաշմիրի Փահալգամ քաղաքում մի խումբ զինյալներ հարձակվել են զբոսաշրջիկների վրա, ինչի հետևանքով 26 մարդ է զոհվել։ Նյու Դելին հարձակման համար մեղադրել է Պակիստանին։
