ԵՄ արտաքին գործերի նախարար Կայա Կալլասը անցյալ տարվա դեկտեմբերի 1-ին նշանակվելուց հետո առաջին անգամ խոսել է Իրանի արտգործնախարար Աբբաս Արաղչիի հետ Իրանի միջուկային ծրագրի մասին։ Այս մասին նա գրել է X-ում։
«Խոսել եմ Իրանի արտգործնախարար Աբբաս Արաղչիի հետ՝ ընդգծելու դիվանագիտության կարևորությունը միջուկային հարցերում և տարածաշրջանում լարվածության թուլացման համար»,- գրել է նա։
Կալլասը կոչ է արել Իրանին դադարեցնել Ռուսաստանին ենթադրյալ ռազմական աջակցությունը և նաև մտահոգություն է հայտնել Իրանում ԵՄ քաղաքացիների լրտեսության համար կալանավորելու կապակցությամբ: Նա ընդգծել է, որ Բրյուսելի և Թեհրանի հարաբերությունները «կախված են այս բոլոր հարցերում առաջընթացից»։
ԵՄ արտաքին գործերի նախարարներ Խավիեր Սոլանան (1999-2009) և Ֆեդերիկա Մոգերինին (2014-2019) եղել են Արևմուտքում Իրանի հետ հիմնական բանակցային գործընկերները, հատկապես միջնորդել են Իրանի միջուկային ծրագրի շուրջ քննարկումները:
