Պաղեստինի նախագահ Մահմուդ Աբասը մտադիր է մայիսի 10-ին Ռուսաստանի առաջնորդ Վլադիմիր Պուտինի հետ հանդիպմանը քննարկել երկկողմ հարաբերությունները և իրավիճակը Գազայի հատվածում: Ինչպես ՏԱՍՍ-ի թղթակցին ասել է նախագահի խորհրդական Մահմուդ ալ-Հաբբաշը, Աբասը նաև ծրագրում է Պուտինին տեղեկացնել պաղեստինյան խնդրի լուծման առաջնահերթությունների մասին:
«Հանդիպումը հնարավորություն կտա քննարկել երկկողմ հարաբերությունների ամրապնդման ուղիները և բոլոր ոլորտներում համատեղ համագործակցությունը, հատկապես, որ Ռուսաստանի և Պաղեստինի միջև առկա են սերտ պատմական կապեր։
Աբասը նաև կտեղեկացնի իր հյուրընկալողներին Պաղեստինի վերջին զարգացումների մասին՝ հաշվի առնելով Իսրայելի շարունակական ագրեսիան Պաղեստինի ժողովրդի դեմ, հատկապես Գազայի հատվածում, և պաղեստինցիների առաջնահերթությունների մասին՝ պաղեստինյան հարցի առջև ծառացած մարտահրավերների հաղթահարման հարցում»,- ասել է նախագահի խորհրդականը։
Ավելի վաղ Ռուսաստանում Պաղեստինի դեսպան Աբդել Հաֆիզ Նոֆալը «Իզվեստիա»-ին ասել էր, որ Աբասը Ռուսաստան կժամանի մայիսի 8-ին, իսկ մայիսի 10-ին ակնկալվում է բանակցություններ վարել Պուտինի հետ: Ալ-Հաբաշի խոսքով՝ Պաղեստինի առաջնորդը «կշնորհավորի Պուտինին Հաղթանակի օրվա կապակցությամբ»:
Նախագահների նախորդ հանդիպումը տեղի է ունեցել 2024 թվականի հոկտեմբերին Կազանում BRICS-ի գագաթնաժողովի ժամանակ։
