ԱԺ «Քաղաքացիական պայմանագիր» խմբակցության պատգամավոր Արսեն Թորոսյանը «Ֆեյսբուք»-ի իր էջում անդրադարձել է Մեսրոպ Առաքելյանի՝ Կիրանցի պատի ճաքի վերաբերյալ գրառմանը:
«Մի նախկին գործընկեր ունենք, որ ժամանակին, այդ թվում 44-օրյա պատերազմից հետո ժողովրդական լեզվով ասած «գյուլլա էր գցում», որ կառավարությունում պաշտոն ստանա, ինչը ցավոք սրտի տեղի ունեցավ։
Հետո նա նախարարի պաշտոնը ծառայեցրեց սեփական փիառի համար ու 2021թ. ապրիլին ազատվեց պաշտոնից, քանի որ պատրաստվում էր այդ կարգավիճակում մտնել ընտրապայքարի մեջ սեփական կառավարության դեմ։
Ու հիմա նա խոսում է ինչ-որ ճաքերի մասին՝ մոռանալով սեփական «ճաքած» կամ ավելի շուտ «տրաքած» քաղաքական արժեհամակարգի մասին»,- գրում է Թորոսյանը։
Ինչպես ավելի վաղ հայտնել էինք, ՀՀ վարչապետ Նիկոլ Փաշինյանը «Հայաստանի տնտեսական մրցունակության բարձրացումը քաղաքականությունների և վարչարարության բարելավման միջոցով» խորագրով գործարար աշխատաժողովի մասնակիցների հետ ապրիլի 17-ին այցելել էր Կիրանց:
Առաքելյանն այդ այցից լուսանկար է տեղադրել և գրել, թե 9 ամիս առաջ կառուցված Կիրանցի հայտնի պատը արդեն ճաքել է:
