Լեհաստանը Միացյալ Նահանգներից Patriot հակաօդային պաշտպանության հրթիռային համակարգերի լոգիստիկ սարքավորումների մատակարարման մասին շուրջ 2 միլիարդ դոլար արժողությամբ պայմանագիր է ստորագրել։
«Արմենպրես»-ի փոխանցմամբ՝ այս մասին հայտնում է «ՌԻԱ Նովոստի»-ն՝ մեջբերելով Լեհաստանի ազգային պաշտպանության նախարար Վլադիսլավ Կոսնյակ-Կամիշի հայտարարությունը։
«Սա շատ կարևոր պահ է: Սա «Վիսլա» ծրագրի երկրորդ փուլի իրականացման հերթական փուլն է: Խոսքը հակաօդային պաշտպանության, հակահրթիռային պաշտպանության մասին է: Մեկ տարի առաջ մենք պայմանագիր ենք կնքել համակարգի «ուղեղի», կառավարման համակարգի մասին: Այժմ այս համակարգի ինտեգրումն է ընթանում: Նախնական պատրաստությունն արդեն ձեռք է բերվել»,- ասել է լեհ նախարարը:
Նա մանրամասնել է, որ այժմ խոսվում է մոտավորապես երկու միլիարդ դոլար արժողությամբ լոգիստիկ աջակցության համակարգերի մատակարարման մասին։
«Այսօր սա ևս մեկ խոշոր ներդրում է Լեհաստանի անվտանգության մեջ: Շուրջ երկու միլիարդ դոլար արժողությամբ ներդրում է: Սա Patriot մարտկոցների լոգիստիկ սարքավորումների մատակարարման պայմանագիր է ամբողջ համակարգի համար: Այս պայմանագրի կարևոր տարրը սիմուլյատորներն են, որոնք թույլ կտան վարժանքներ կատարել օդային հարձակումները հետ մղելու համար», - նշել է նա:
