Վլադիմիր Զելենսկին, ով դեռ չի չեղարկել ՌԴ նախագահ Վլադիմիր Պուտինի հետ բանակցություններն արգելող հրամանագիրը, պնդում է, որ Ուկրաինայի համար «մեծ խնդիր» չի լինի Ռուսաստանի ներկայացուցիչների հետ հանդիպելը։
«Հանդիպումը խնդիր չէ»,- ասել է նա առցանց ճեպազրույցում՝ պատասխանելով հարցին, թե երբ կարող է կայանալ ռուսական և ուկրաինական կողմերի հանդիպումը։ Ճեպազրույցի ձայնագրությունը հրապարակվել է Զելենսկու գրասենյակի YouTube ալիքում։
«Հարցը բացարձակապես պրագմատիկ է, եթե կան ապացուցված տարբերակներ, որոնք կարող են մեզ մոտեցնել պատերազմի ավարտին, մենք կշարժվենք, և միայն առաջ՝ առանց որևէ դադարի կամ սենտիմենտալության», - հավելել է նա։
Խոսելով ԱՄՆ-ի հետ առաջիկա շփումների մասին՝ նա հույս է հայտնել, որ դրանք Սաուդյան Արաբիայում տեղի կունենան ուրբաթ, շաբաթ կամ կիրակի օրերին։ Միևնույն ժամանակ, մարտի 18-ին ԱՄՆ առաջնորդի հատուկ բանագնաց Սթիվեն Վիտկովն ասել է, որ Ռուսաստանի և Միացյալ Նահանգների միջև նոր շփումներ տեղի կունենան «կիրակի օրը Ջիդդաում»։
