Սկանդինավյան և Բալթյան երկրները կոչ են արել մշակել «ճանապարհային քարտեզ» Եվրամիությանն Ուկրաինայի արագացված միանալու համար՝ Հունգարիայի հետ տարաձայնությունների լույսի ներքո: Այս մասին հայտնում է Politico եվրոպական
հրատարակությունը՝ հղում կատարելով երկրների համատեղ նամակին։
Ուղերձը կազմվել է Դանիայի, Ֆինլանդիայի և Շվեդիայի, ինչպես նաև Լատվիայի, Լիտվայի և Էստոնիայի բարձրաստիճան դիվանագետների կողմից, որոնք Բրյուսելին կոչ են արել «կոնկրետ առաջարկներ պատրաստել ԵՄ-ին Ուկրաինայի անդամակցության գործընթացն էապես արագացնելու վերաբերյալ», նշում է հրատարակությունը։
«Հաստատելով ԵՄ-ին Ուկրաինայի անդամակցության գործընթացին մեր լիակատար և անվերապահ հանձնառությունը՝ մենք կոչ ենք անում արագացնել անդամակցության գործընթացը»,- մեջբերում է Politico-ն նամակից մի հատված։
Վեց պետությունները նաև պնդում են, որ կողմերի միջև տարաձայնությունները, որոնք հակասում են համայնքի ռազմավարական շահերին, չպետք է խանգարեն Ուկրաինային միանալուն, այլ պետք է լուծվեն երկխոսության միջոցով:
