ՌԴ նախագահ Վլադիմիր Պուտինի՝ Ուկրաինայում հրադադարի հաստատմանն աջակցելու հայտարարությունը հակամարտությունը կարգավորելու համար իրական բանակցությունների մեկնարկի նշան է։ France 2 հեռուստաալիքի եթերում նման կարծիք է հայտնել Ֆրանսիայի զինված ուժերի նախարար Սեբաստյան Լեկորնուն։
«Այն, ինչը տանում է դեպի հրադադար, կարելի է միայն ողջունել, մենք տեսնում ենք, որ իրական բանակցություններ են սկսվում։ Առջևում քննարկում կա, բանակցություններ, որոնք ակնհայտորեն կծավալվեն Վաշինգտոնի և Մոսկվայի միջև, բայց դրանք պետք է կազմակերպվեն նաև Կիևի և Մոսկվայի միջև, որոնք երկու պատերազմող կողմեր են, ինչպես նաև եվրոպական մայրաքաղաքների հետ, քանի որ Ուկրաինայում տեղի ունեցող հարցի հետևում ակնհայտորեն թաքնված են եվրոպական մայրցամաքի անվտանգության ճարտարապետության հետ կապված հարցեր»,-ասել է նախարարը։
Նա չի պատասխանել հաղորդավարի այն հարցին, թե արդյոք Ուկրաինան այժմ պարտվում է մարտի դաշտում, սակայն խոստովանել է, որ Ռուսաստանի Դաշնությունը «առավելություն ունի»։ Լեկորնուն հավելել է, որ Ֆրանսիան դեմ է «տակտիկական դադարին», որը թույլ կտա Ռուսաստանին «վերականգնել իր ուժը»։
