Սլովակիայից Եվրախորհրդարանի պատգամավոր Լյուբոս Բլագան կարծում է, որ միայն Ռուսաստանը կարող է թելադրել Ուկրաինայում խաղաղության հաստատման պայմանները, քանի որ հենց նա է հաղթում մարտի դաշտում։
«Ուզենք, թե չուզենք, հաշվի առնելով մարտադաշտում տիրող իրավիճակը, Ռուսաստանն է, որ կարող է պայմաններ դնել, ոչ ոք»,- РИА Новости-ի փոխանցմամբ՝ հինգշաբթի գրել է Բլագան Telegram-ի իր ալիքում։
Նա նշել է, որ զինադադարը պետք է կապել խաղաղության պայմանագրի հետ, որը կներառի ռուսական պահանջները, «քանի որ Ռուսաստանը պարզապես հաղթում է դաշտում»։
«Առանց Ռուսաստանի հետ նորմալ խաղաղ բանակցությունների խաղաղություն չի լինի»,- եզրափակեց պատգամավորը։
Երեքշաբթի օրը Սաուդյան Արաբիայում կայացել է ԱՄՆ-ի և Ուկրաինայի պատվիրակությունների հանդիպումը։ Վլադիմիր Զելենսկու գրասենյակը բանակցություններից հետո հրապարակել է Կիևի և Վաշինգտոնի համատեղ հայտարարությունը, որում նշվում է, որ Կիևը պատրաստ է 30 օրով հրադադարի մասին ԱՄՆ-ի առաջարկին, որը կարող է երկարաձգվել կողմերի համաձայնությամբ։ Փաստաթղթում նշվում է նաև, որ ԱՄՆ-ն անմիջապես կչեղարկի հետախուզության փոխանակման դադարը և կվերսկսի ռազմական մատակարարումները Ուկրաինային։
ՌԴ նախագահի օգնական Յուրի Ուշակովն ասել է, որ 30-օրյա զինադադարի մասին առաջարկը, որը համաձայնեցվել է Սաուդյան Արաբիայում ԱՄՆ-ի և Ուկրաինայի ներկայացուցիչների հանդիպմանը, պետք է վերջնական տեսքի բերվի՝ հաշվի առնելով Ռուսաստանի շահերը։ Նա նաև այս զինադադարն անվանել է ոչ այլ ինչ, քան ժամանակավոր հանգստություն ուկրաինացի զինվորականների համար։
Ուշակովը հիշեցրել է, որ Ռուսաստանը հավատարիմ է Ուկրաինայում երկարաժամկետ խաղաղ կարգավորմանը, որը հաշվի է առնում Մոսկվայի շահերն ու մտահոգությունները։ Նա նշել է, որ Ուկրաինայում ԱՄՆ-ի առաջարկած ժամանակավոր զինադադարի վերաբերյալ պաշտոնական դիրքորոշումը կձևակերպի ՌԴ նախագահ Վլադիմիր Պուտինը։
Թարգմանությունը՝ Մանուել Թամազյանի
