Լոռի Բերդ համայնքի Կողես բնակավայրում երրորդ քարի հանքն են ուզում բացել։ Այս մասին տեղեկացնում է «Քաղաքացու ձայն» ՀԿ-ը։
«Նախաձեռնողը՝ «ԳՐԱՆԱՐՄ» ՍՊԸ-ն է, որը ցանկանում է 4,5 հա տարածքում արդյունահանել գրանո-սիենիտներ։
2025թ․մարտի 3-ին Կողեսի վարչական շենքում կայացավ Երկրաբանահետախուզական աշխատանքներ իրականացնելու և շրջակա միջավայրի վրա ազդեցության նախնական գնահատման հայտի վերաբերյալ, հանրային առաջին լսումը։
Կողեսցիներին հուզող գլխավոր հարցն այն է, թե հանքի շահագործումն ինչ ռիսկեր է ենթադրում։
«ԳՐԱՆԱՐՄ» ընկերության ներկայացուցչի խոսքով՝ գյուղում սոցիալական ծրագրեր իրականցնելու փաթեթ ունեն։ Սակայն այս ու ներկաներին հուզող մեկ այլ՝ աշխատատեղերի վերաբերյալ հարցերի մասին կխոսեն արդյունահանման թույլտվությունն ստանալուց հետո միայն։
Սակայն այդպես էլ չհստակեցվեց, թե «ԳՐԱԱՐՄ» ընկերությունը արդյունահանաման թույլտվություն ստանալու դեպքում ինչ սոցիալական ծրագրեր է իրականացնելու գյուղում կամ որքան գումար է վճարելու համայնքի բյուջե սոցիալական ծրագրեր իրականացնելու համար։ Արդյո՞ք գյուղացիները կկարողանան աշխատել հանքում, թե ոչ կամ քանի աշխատատեղ կստեղծվի։ Ո՞րն է գյուղի շահը։ Ըստ Կողեսի վարչական ղեկավարի, ընկերության կողմից վարձակավող հողերից ստացված եկամուտը կուղղեն գյուղում զարգացման ծրագրեր իրականացելուն։
Հայցվող տարածքը գտնվում է գյուղի բնակելի տարածքից մոտավորապես 1,4 կիլոմետր հեռավորության վրա՝ արդեն շահագոծվող մյուս երկու հանքավայրերի հարևանությամբ։
Իսկ որքանո՞վ է ազդում գործող երկու քարի հանքերից առաջացող փոշին գյուղատնտեսական հողերի վրա, Կողեսի վարչական ղեկավարը դժվարացավ պատասխանել, ասաց՝ շահագործման ընթացքում մասնագիտական հետազոտություն չի արվել։
Խնդրի վերաբերյալ որևէ ասելիք չունեին նաև գյուղի բնակիչները, ասացին՝ գյուղում փոշի չեն տեսել։
Հանրային լսման հաջորդ փուլը տեղի կունենա շրջակա միջավայրի նախարարության փորձագետի մասնակցությամբ, եթե Լոռի Բերդի ավագանին համաձայնություն տա նախատեսվող գործունեությանը։ 30 աշխատանքային օրվա ընթացքում ավագանին նիստ կգումարի՝ վերոնշյալ հարցին համաձայնություն կամ անհամաձայություն տալու համար։
Նշենք, որ ըստ Արդարադատության նախարարության իրավաբանական անձանց պետական ռեգիստրի էլեկտրոնային համակարգում առկա տվյալների՝ «Գրանարմ» ընկերության իրական շահառուն Դավիթ Ազատյանն է, որը հանդիսանում է նաև «Տուֆարտ» ընկերության 100 տոկոս բաժնետերը։ Տուֆարտ ընկերությունը ստացել է նաև Կոտայքի մարզի Մայակովսկու տուֆերի հանքավայրի «Տուֆարտ» տեղամասում երկրաբանական ուսումնասիրության աշխատանքներ կատարելու թույլտվություն։ Դավիթ Ազատյանը 20 տոկոսի բաժնեմաս ունի նաև «ԱՐ-ՔՆՍԹՐԱՔՇՆ» ընկերությունում, որը արդյունահանման թույլտվություն ունի Արամուսի բազալտների հանքավայրում։
Նշված բնակավայրում ընկերության կողմից իրականացվող սոցիալական ծրագրերի վերաբերյալ տեղեկություն հիշատակված չէ տվյալների բաց տիրույթում»։
