«Լուսավոր Հայաստան» կուսակցության նախագահ Էդմոն Մարուքյանը Ֆեյսբուքի իր էջում գրել է․
«Մինչ օրս իշխանությունները պնդում էին, որ ԵԱՀԿ Մինսկի խմբի լուծարումը հնարավոր է միայն խաղաղության պայմանագրի ստորագրումից հետո, և այդ մոտեցումն ընկալվում էր որպես Հայաստանի հստակ և կուռ դիրքորոշում։
Սակայն այսօր վարչապետի մամուլի քարտուղար Նազելի Բաղդասարյանը հայտարարեց, որ Հայաստանը պատրաստ է քննարկել կառույցի լուծարումը՝ առանց խաղաղության պայմանագրի կնքման, առանց որևէ միջազգային երաշխիքների կամ հստակ պայմանավորվածությունների։ Իշխանությունները փորձում են համոզել հասարակությանը, որ հակամարտությունն այլևս գոյություն չունի, ինչով հիմնավորվում է Մինսկի խմբի անպետք լինելը։
Սակայն այդ փաստարկը պատրանք է և խիստ հակասում է իրականությանը։ Եթե իսկապես հակամարտություն չկա, ապա ինչո՞ւ են ադրբեջանական զինված ուժերը գտնվում Հայաստանի ինքնիշխան տարածքում: Ինչո՞ւ են հայ ռազմագերիները և գերեվարված ՀՀ քաղաքացիները, ինչպես նաև Լեռնային Ղարաբաղի ժողովրդի կողմից ընտրված անձինք պահվում ադրբեջանական բանտերում։ Ինչո՞ւ է Լեռնային Ղարաբաղի ժողովուրդը զրկված իր հայրենի բնօրրան վերադարձի իրավունքից։
Հրաժարվելով կարևորագույն դիվանագիտական գործիքից, որը տարիներ շարունակ ծառայել է մեր շահերի պաշտպանությանը, մենք թուլացնում ենք Հայաստանի դիրքերը և Ադրբեջանին տրամադրում նոր լծակներ՝ ճնշում գործադրելու համար։ Այսպիսով, հայկական բանակցային ֆոնդը զրկվում է բովանդակությունից և սպառվում։
Մեր վերջին դիվանագիտական խաղաքարտերը միակողմանի զիջվում են թշնամուն՝ կրկին ոչ մի բանի դիմաց և նախապես հիմնավորված դիրքորոշումը հապճեպ փոխելու արդյունքում: Խստիվ դատապարտում եմ և հույս ունեմ, որ Հայաստանի քաղաքացիները և քաղաքական ուժերը համապատասխան հետևություններ կանեն այս ամենից»։
